Numbers 32

Izizwana zangaphetsheya kweJodani

1AbakoRubheni labakoGadi ababelemihlambi emikhulu yezinkomo leyezimvu, babona ukuthi amadlelo emmangweni weJazeri leGileyadi ayemahle ezifuyweni. 2Ngakho baya kuMosi laku-Eliyazari umphristi lakubakhokheli babantu, bathi,

3“Umhlaba we-Atharothi, Dibhoni, Jazeri, Nimra, Heshibhoni, Eliyale, Sebhami, Nebho kanye leBheyoni – 4umhlaba uJehova awunqoba phambi kwabako-Israyeli – ngumhlaba olungele izifuyo, njalo thina nceku zenu silezifuyo.” 5Basebestihi, “Nxa sifumene umusa emehlweni enu, lelilizwe aliphiwe izinceku zenu libe yisabelo sethu. Lingasicindezeli ukuba sichaphe uJoda-ni.”

6UMosi wabuza abakoGadi labakoRubheni wathi, “Kambe lingahlala lapha amanye amadoda akini esiya empini na? 7Kungani lithelela abakoIsrayeli ukwesaba ukungena elizweni abaliphiwa nguJehova na? 8Yikho lokhu okwenziwa ngoyihlo ekubathumeni kwami besuka eKhadeshi Bhaneya ukuyahlola ilizwe. 9Bathi sebehambe baze bayafika eSigodini sase-Eshikale balibona ilizwe, bathelela abako-Israyeli ukwesaba ukungena elizweni abaliphiwa nguJehova. 10Ulaka lukaJehova lwaqubuka ngalolosuku waze wenza lesisifungo. 11‘Ngenxa yokuthi abangilandelanga ngezinhliziyo zabo ezipheleleyo, kakho loyedwa emadodeni wonke aleminyaka engamatshumi amabili kusiya phezulu okuzalwa kwabavela eGibhithe ozabona ilizwe engalithembisa u-Abhrahama, u-Isaka loJakhobe ngesifungo – 12kakho loyedwa ngaphandle kukaKhalebi indodana kaJefune umKhenizi kanye loJoshuwa indodana kaNuni, ngoba laba balandela uJehova ngezinhliziyo ezipheleleyo.’ 13Ulaka luka Jehova lwavutha wabazondela abako-Israyeli njalo wabenza bantula enkangala okweminyaka engamatshumi amane, kwaze kwaphela bonke abentanga yalabo ababonile phambi kukaJehova.

14“Khathesi nanku-ke lina, nzalo yezoni, selimi endaweni yaboyihlo libangela ukuthi uJehova athukuthelele abako-Israyeli ngamandla. 15Nxa lingala ukumlandela, uJehova uzaphinde atshiye bonke lababantu bakhe enkangala, njalo kuzabe kuyini elibangele incithakalo yabo.”

16Ngakho beza kuye bathi, “Sifuna ukwakha izibaya zezifuyo zethu njalo sakhele omkethu labantwabethu amadolobho. 17Kodwa thina sesilungele ukuzihlomisa ukuze sikhokhele abako-Israyeli size siyebafikisa endaweni yabo. Kunjalo nje omkethu labantwabethu bazasala emadolobheni avikelekileyo, ukuze bangahlaselwa ngabanikazi balelolizwe.

18Kasiyikubuyela kweyethu imizi wonke owako-Israyeli aze azuze isabelo sakhe. 19Thina kasiyikuzuza isabelo kanye labo ngale kweJodani, ngoba esethu isabelo sisithole ngapha ngempumalanga kweJodani.”

20Ngakho uMosi wathi kubo, “Nxa lizakwenza lokhu – lizihlomisele ukuhlasela phambi kukaJehova, 21njalo nxa lonke lizahamba lihlomile ngale kweJodani phambi kukaJehova aze adudule izitha phambi kwakhe – 22kuze kuthi nxa ilizwe selinqotshiwe phambi kukaJehova selingaphenduka njalo liyabe selikhululekile emlandwini wenu kuJehova laku-Israyeli. Ngalokho-ke lelilizwe lizakuba yisabelo senu phambi kukaJehova.

23“Kodwa lingehluleka ukwenza lokhu, lizabe lonile phambi kukaJehova; njalo yazini ukuthi isono senu sizalifumana. 24Yakhelani abesifazana benu labantwabenu amadolobho, njalo lakhele izifuyo zenu izabaya, kodwa yenzani lokho elikuthembisileyo.”

25AbakoGadi labakoRubheni bathi kuMosi, “Thina izinceku zakho sizakwenza njengokulaya kukaJehova wethu. 26Abantwabethu labomkethu, imihlambi yezimvu zethu leyezinkomo zethu kuzasala lapha emadolobheni aseGileyadi.

27Kodwa thina zinceku zakho, yonke indoda ehlomele ukuhlasela, izachapha iyekulwa phambi kukaJehova, njengokutsho kukaJehova wethu.”

28UMosi wasekhupha ilizwi lesiqondiso ngabo ku-Eliyazari umphristi lakuJoshuwa indodana kaNuni kanye lakuzinhloko zezimuli zezizwana zako-Israyeli. 29Wathi kubo, “Nxa abakoGadi labakoRubheni, wonke amadoda ayehlomele ukuhlasela, angachaphela ngale kweJodani kunye lani phambi kukaJehova, kube sekusithi nxa ilizwe selinqotshiwe phambi kwenu banikeni ilizwe laseGileyadi libe yisabelo sabo. 30Kodwa nxa bengachaphanga lani behlomile, kumele bemukele isabelo sabo kunye lani eKhenani.”

31AbakoGadi labakoRubheni baphendula bathi, “Izinceku zakho zizakwenza okutshiwo nguJehova. 32Sizachaphela ngale phambi kukaJehova singene eKhenani sihlomile, kodwa ilifa eliyisabelo sethu lizakuba nganeno kweJodani.”

33Ngakho uMosi wasenika abakoGadi, labakoRubheni kanye lengxenye yesizwana sakoManase indodana kaJosefa umbuso kaSihoni inkosi yama-Amori kanye lombuso ka-Ogi inkosi yaseBhashani – ilizwe lonke kanye lamadolobho alo kanye lamazwe ayebagqagqele.

34Abako-Gadi bakha iDibhoni, i-Atharothi, i-Aroweri, 35i-Afrothi Shofani, iJaze-ri, iJogibheha, 36iBhethi Nimura kanye leBhethi Harani aba ngamadolobho ahonqolozelwe ngemithangala, njalo bakha lezibaya zemihlambi yezifuyo zabo.

37Kanti-ke abakoRubheni bakha kakutsha iHeshibhoni, i-Eliyale kanye leKhiriyathayimi,

38kanye lokwakha iNebho kanye leBhali Meyoni (la amabizo aguqulwa) njalo leSibhima. Betha amadolobho abawakha kutsha amabizo.

39Izizukulwane zikaMakhiri indodana kaManase zaya eGileyadi, zalithumba njalo zaxotsha ama-Amori ayekulelolizwe. 40Ngakho uMosi wapha elaseGileyadi kumaMakhiri, izizukulwana zikaManase, basebehlala khona.

41UJayiri, umzukulu kaManase, wathumba imizi yabo wayibiza ngokuthi yiHarothi Jayiri.

42Kanti uNobha wathumba iKhenathi kanye lemizi eyigqagqeleyo njalo wayetha ibizo lakhe wathi yiNobha.